Gen 25 | NdeIBE | STEP | U-Abhrahama wathatha omunye umfazi okwakuthiwa nguKhethura.

Genesis 25

Ukufa kuka-Abhrahama

1 U-Abhrahama wathatha omunye umfazi okwakuthiwa nguKhethura.

2 Wamzalela uZimrani, loJokishani, loMedani, loMidiyani, lo-Ishibhaki loShuwa.

3 UJokishani wazala uSheba loDedani; isizukulwane sikaDedani saba ngama-Ashuri, lamaLethushi lamaLehumi. 4 Amadodana kaMidiyani kwakungo-Efa, lo-Eferi, loHanokhi, lo-Abhida lo-Elida. Bonke laba babeyizizukulwane zikaKhethura.

5 Konke u-Abhrahama ayelakho wakutshiyela u-Isaka. 6 Kodwa wathi esaphila wanika izipho kumadodana abafazi bakhe beceleni wabasusa eduze kwendodana yakhe u-Isaka baya elizweni lasempumalanga.

7 Isiyonke u-Abhrahama waphila okweminyaka elikhulu lamatshumi ayisikhombisa lesihlanu. 8 Yikho u-Abhrahama wacitsha umphefumulo, wafa eseluphele, eselixhegu elileminyaka eminengi; wambelwa labakibo. 9 Amadodana akhe o-Isaka lo-Ishmayeli bamngcwaba ebhalwini lwase-Makhaphela eduze leMamure, esiqintini sika-Efroni indodana kaZohari umHithi, 10 isiqinti leso u-Abhrahama asithenga kumaHithi. Khonapho u-Abhrahama wangcwatshwa lomkakhe uSara. 11 Ngemva kokuba esefile u-Abhrahama uNkulunkulu wayibusisa indodana yakhe u-Isaka, owayehlala eBheyeri Lahayi Royi.

Amadodana ka-Ishmayeli

12 Lo ngumlando wendodana ka-Abhrahama u-Ishmayeli, incekukazi kaSara uHagari eyamzalela u-Abhrahama.

13 La ngamabizo abantwana baka-Ishmayeli behlelwe ngokwelamana kwabo: nguNebhayothi izibulo lika-Ishmayeli, loKhedari, lo-Adibheli, loMibhisami, 14 loMishima, loDuma, loMasa, 15 loHadadi, loThema, loJethuri, loNafishi kanye loKhedema. 16 La ayengamadodana ka-Ishmayeli, lala ngamabizo ababusi bezizwana ezilitshumi lambili kulandela ukuhlaliswa kwazo lemizi yazo.

17 Isiyonke, u-Ishmayeli waphila okweminyaka elikhulu lamatshumi amathathu lesikhombisa. Wacitsha umphefumulo wafa, wambelwa labakibo. 18 Izizukulwane zakhe zakhela emmangweni osuka eHavila kusiya eShuri, eduzane lomngcele waseGibhithe, nxa uqonda e-Ashuri. Njalo baphila belenzondo labafowabo bonke.

U Jakhobe lo-Esawu

19 Lo ngumlando wendodana ka-Abhrahama u-Isaka. U-Abhrahama wazala u-Isaka, 20 u-Isaka wathi eseleminyaka engamatshumi amane obudala wathatha uRabheka indodakazi kaBhethuweli umAramu wasePhadani Aramu njalo engudadewabo kaLabani umAramu.

21 U-Isaka wakhuleka kuJehova ekhulekela umkakhe ngokuba wayeyinyumba. UJehova wawuphendula umthandazo wakhe, umkakhe uRabheka wazithwala. 22 Abantwana bafuqana phakathi kwakhe, wathi, “Kungani lokhu kusenzakala kimi?” Yikho wasehamba wayabuza kuJehova.

23 UJehova wathi kuye, “Izizwe ezimbili zisesiswini sakho, njalo abantu ababili phakathi kwakho bazakwehlukaniswa; ingxenye yabantu izakuba lamandla kulenye, kuthi omdala uzakhonza omncinyane.”

24 Kwathi isikhathi sakhe sokubeletha sesifikile, kwakulamaphahla angabafana esiswini sakhe. 25 Owabona ilanga kuqala wayebomvu, umzimba wakhe wonke ulihwanqa njengengubo yoboya; yikho bamutha bathi ngu-Esawu. 26 Ngemva kwalokhu, umfowabo walandela, isandla sakhe sibambe isithende sika-Esawu; ngakho wathiwa nguJakhobe. UIsaka wayeleminyaka engamatshumi ayisithupha uRabheka ebazuza.

27 Bakhula abafana, u-Esawu waba ngumzingeli omkhulu, indoda yegangeni, kodwa uJakhobe wayeyindoda ethuleyo, engasuki ngekhaya emathenteni. 28 U-Isaka owayethanda inyama yenyamazana wayethanda u-Esawu, kodwa uRabheka wayethanda uJakhobe.

29 Ngesinye isikhathi uJakhobe wayepheka inyama, u-Esawu wafika evela egangeni elambile. 30 Wathi kuJakhobe, “Phangisa, akungiphe ukudla kwakho lokho osukukhanzinge kwaba bomvana! Sengifile ngendlala!” (Yikho wabizwa ngokuthi ngu-Edomi.)

31 UJakhobe waphendula wathi, “Qala ungithengisele ubuzibulo bakho.”

32 U-Esawu wathi, “Khangela, sengisifa. Bungisiza ngani ubuzibulo lobo?”

33 Kodwa uJakhobe wathi, “Qala ufunge kimi.” Yikho wasefunga isifungo kuye, ethengisa ubuzibulo bakhe kuJakhobe.

34 Yikho uJakhobe wasesipha u-Esawu isinkwa lokudla kwendumba eziphekwa ziluhlaza. Wadla, wanatha, wasukuma wahamba. Ngaleyondlela u-Esawu wabeyisa ubuzibulo bakhe.